MIL. 10 ZALIPIA BIMA ZA WANAKIJIJI CHA MASHESE

Posted on: January 20th, 2025

Serikali ya kijiji cha Mashese kata ya Ilungu Halmashauri ya Wilayani Mbeya, imewalipia bima za afya wananchi wake zaidi ya 1500 kwa gharama ya million kumi ili kuwa na uhakika wa huduma za kiafya na kujenga jamii imara.

Akizungumza na kituo hiki katika Zahanati ya Ilungu kijijini hapo, mwenyekiti wa kijiji cha Mashese Osia Mwakalila amesema kusudi la Serikali yake ya kijiji ni kuona inatoa bima za afya kwa watu elfu mbili wa kijiji hicho hata waishio nje ya kijiji kwa shughuli mbalimbali ikiwemo wanafunzi.

"Serikali ya kijiji (Mashese) tulipokaa tukaangalia kutokana na vyanzo vyetu vya mapato ya kijiji tukaamua kuwakatia bima za afya wananchi na lengo letu ni wananchi wote wapate bima kwasababu wengi hawana kipato tukitembelea wananchi huko tukaona wanaumwa halafu hawana hela. Tunachoomba Serikali na wadau watusaidie vifaa vya maabara kuja hapa Zahanati ya Ilungu na pia wadau wakiwemo waliotoka hapa Mashese tunatamani hili liwe endelevu", amesema mwenyekiti wa Serikali ya kijiji cha Mashese kata ya Ilungu.

Kwa upande wake mganga mfawidhi wa Zahanati ya Ilungu amesema bima ya CHF iliyokatwa kwa ajili ya wananchi hao ni kwa familia au kikundi cha watu sita kwa shilingi elfu thelathini akisema ni hatua muhimu katika kuhakikisha jamii inakuwa na watu wenye afya imara huku akiwatoa hofu wananchi wanaodhani wenye bima hawathaminiwi wanapokwenda hospitalini.

Mratibu wa bima ya CHF wilaya ya Mbeya Francisco Nguvila, amesema kilichofanywa na Serikali ya kijiji cha Mashese kuwakatia bima wananchi wake ni kitendo cha kuigwa na maeneo mengine katika kuhakikisha jamii inakuwa na afya imara na kuchochea maendeleo ya Taifa.

Wananchi waliofikiwa na huduma hiyo wameishukuru Serikali yao kwa mpango huo ambao umetekelezwa kupitia raslimali za kijiji kuona zinarudi kwao (wananchi) kwa njia nyinginezo ikiwemo kujali afya za wananchi wake.