WANANCHI WA NSENGA WAPEWA ONYO KALI

Posted on: September 24th, 2018

Naibu waziri wa maji na umwagiliaji Mhe. Jumaa Hamidu Aweso amekemea vikali tabia ya wananchi wa kijiji cha Nsenga,kata ya Swaya ya kuharibu  miundo mbinu ya maji kwani serikali imekusudia kuhakikisha inamtua mama ndoo kichwani.

Karipio hilo amelitoa kwenye ziara ya kutembelea na kukagua  miradi  ya maji Halmashauri ya Wilaya ya Mbeya septemba 24,2018  akiwa anapokea  taarifa kutoka kwa diwani wa kata ya Swaya Mhe. Julius Ntokani yakuwa wananchi wa Nsenga wamekuwa na tabia ya kuhujumu miundo mbinu ya maji ikiwemo kukata mabomba mara kwa mara hata yakifanyiwa marekebisho.

 Aweso amesema kuwa serikali  inafahamu kuwa wananchi wanahitaji maji safi na salama hivyo  imekusudia kutoa na kusimamia huduma bora za maji  kama wananchi wanatakiwa kuacha tabia hiyo mara moja.

Kwa upande mwingine naye Mbunge wa jimbo la Mbeya vijiji Oran Njeza amemuomba waziri wa maji na Umwagiliaji kuwaangalia kwa ukaribu na kwa huruma wananchi wa jimbo la Mbeya vijiji kwani wanauhitaji mkubwa wa maji safi na salama.